བསོད་ནམས་ཀྱི་ཚོགས་གསོག་པ་ནི་འཛིན་པ་ཞིག་མ་ཡིན་ནམ།
ལེའུ་ལྔ་པ།
སངས་རྒྱས་བྱིན་རླབས་བསམ་མི་ཁྱབ།
གལ་སྲིད་ཅི་བསམ་ལྷུན་གྱིས་འགྲུབ་པ་དང་གཟུགས་ཕུང་བདེ་ཞིང་ཐང་བ། ཁྱིམ་ཚང་བདེ་སྐྱིད་ཀྱི་དཔལ་ལ་རོལ་བསམས་ན་བསོད་ནམས་ཀྱི་ཚོགས་ཅིས་ཀྱང་གསོག་དགོས།
གལ་སྲིད་ཆོས་ལ་བར་ཆད་མེད་པ་དང་གོལ་ས་རུ་མི་འཕྱན་པར་འདོད་ན་བསོད་ནམས་ཀྱི་ཚོགས་ངེས་པར་དུ་གསོག་དགོས།
གལ་སྲིད་ཤེས་རབ་འཕེལ་བའམ་ཐ་ན་བདེན་པ་མཐོང་བ་དང་འཚང་རྒྱ་བར་འདོད་ན་བསོད་ནམས་ཀྱི་ཚོགས་ངེས་པར་དུ་གསོག་དགོས།
མི་མང་པོ་རྒྱུན་དུ་གོལ་ས་ཞིག་ཏུ་ལྷུང་ནས་ཆོས་ལ་བསླབས་ན་དགེ་བ་ལ་འཛིན་པ་སྤོང་དགོས་ཤིང་མི་དགེ་བ་ལ་ཡང་འཛིན་པ་སྤོང་དགོས་པ་དང་ཆོས་ཐམས་ཅད་སྤྲོས་བྲལ་སྟོང་པ་ཉིད་ཡིན་ཞེས་བསམས་ནས་སྤྱོད་པ་ཐམས་ཅད་བྱུང་རྒྱལ་ཁོ་ན་བྱེད་པ་རེད།
དོན་དུ་སྟོང་ཉིད་དུ་འཛིན་པ་ཡང་འཛིན་པ་ཞིག་ཡིན་པ་མ་ཟད་ད་དུང་འཛིན་པ་འཇིགས་སུ་རུང་བ་ཞིག་ཀྱང་ཡིན།བཅོམ་ལྡན་འདས་ཀྱིས་ཡོད་པར་ལྟ་བའི་འཛིན་པ་རི་རྒྱལ་ཙམ་ལྡན་པ་སླ་ཡི་མེད་པར་ལྟ་བའི་འཛིན་པ་ཡུངས་དཀར་ཙམ་ནི་མ་ཡིན་ནོ་ཞེས་གསུངས།
བདེན་པ་མཐོང་ནས་སེམས་ཉིད་ཀློང་དུ་མ་གྲོལ་བའི་སྔོན་དུ་རང་རེས་དགེ་བ་དང་བདེན་པའི་ཆོས་ལ་འཛིན་པ་གཏན་ནས་འདོར་མི་རུང་།དེ་ནི་ཆུ་བརྒལ་བའི་གྲུ་དང་མཚུངས་པས་ཕ་རོལ་ཏུ་མ་ཕྱིན་བར་དུ་དེ་ལ་བརྟེན་དགོས།དེ་འདྲ་མིན་པར་ཆུའི་དབུས་སུ་སླེབས་ཚེ་གྲུ་དོར་ན་འབྲས་བུ་གང་འདྲ་ཞིག་འབྱུང་བ་ང་ཚོ་ཚང་མས་ཤེས་གསལ་ལྟར་རེད།
དེའི་ཕྱིར།ཆོས་ལ་སློབ་སྐབས་ལས་རྒྱུ་འབྲས་ཀྱི་བླང་དོར་ཚུལ་དང་མཐུན་པར་བྱེད་པ་ནས་ངེས་པར་དུ་མགོ་རྩོམ་དགོས།འཛིན་པ་སྤང་དགོས་ཞེས་པ་སྡིག་སྒྲིབ་གསོག་པའི་ཁ་གཡར་ས་རྩ་བ་ཉིད་ནས་བྱེད་མི་རུང་།དེ་དང་མཉམ་དུ་བསོད་ནམས་ཀྱི་ཚོགས་གསོག་པའི་ལས་ལ་ཅི་ནུས་ཀྱིས་གཞོལ་དགོས།གང་ལྟར་དགེ་བ་མེ་སྟག་ཙམ་ལ་ཡང་ཕན་ཡོན་བསམ་གྱིས་མི་ཁྱབ་པ་ལྡན་པས་སོ།།
མདོ་སྡེ་དཔེ་སྣ་ཚོགས་རྙིང་མ་ཞེས་པའི་ནང་དུ་འདི་སྐད་ཅིག་འཁོད་ཡོད།
ཐེངས་ཤིག་སྟོན་པ་བཅོམ་ལྡན་འདས་མཉན་ཡོད་དུ་བསོད་སྙོམས་ལ་གཤེགས་ནས་དགེ་བསྙེན་མ་ཞིག་གི་ཁྱིམ་གྱི་སྒོ་དྲུང་དུ་འབྱོར།དགེ་བསྙེན་མ་དེ་ཚུལ་ཁྲིམས་ལ་རབ་ཏུ་གནས་པ་ཅན་ཞིག་ཡིན་པས་བཟའ་བ་བཅོམ་ལྡན་འདས་ཀྱི་ལྷུང་བཟེད་དུ་ཕུལ་རྗེས་ཕྱིར་བཀྱེད་དེ་གུས་པས་ཟུར་ཞིག་ཏུ་འཁོད།
དེའི་ཚེ་བཅོམ་ལྡན་འདས་ཀྱིས་དགེ་བསྙེན་མ་ལ་ཆོས་བསྟན།གཅིག་འཛུགས་ན་བཅུ་འཕེལ།བཅུ་འཛུགས་ན་བརྒྱ་འཕེལ།བརྒྱ་འཛུགས་ན་སྟོང་འཕེལ།དེ་བཞིན་ཁྲི་ཕྲག་ཐེར་འབུམ་དུ་མ་རུ་འཕེལ་ནས་བདེན་པ་མཐོང་ངོ་ཞེས་བཀའ་བསྩལ།དེ་ཡང་དགེ་བའི་ས་བོན་གཅིག་འཛུགས་ན་འབྲས་བུ་བཅུ་རུ་འཕེལ་ཞིང་བཅུ་འཛུགས་ན་བརྒྱ་རུ་འཕེལ།བརྒྱ་འཛུགས་ན་སྟོང་དུ་འཕེལ།དེ་བཞིན་དུ་ཁྲི་ཕྲག་དང་དུང་ཕྱུར་ཐེར་འབུམ་དུ་མར་འཕེལ་ནས་མཐར་འཕགས་པའི་བདེན་པ་མཐོང་ནུས་ཞེས་པའི་དོན་ཡིན།
བུད་མེད་དེའི་ཁྱོ་བོ་ཆོས་ལ་མི་དད་པས་སྟོན་པ་བཅོམ་ལྡན་འདས་ཀྱི་ཚིགས་སུ་བཅད་པ་དག་ཐོས་རྗེས་དགེ་སྦྱོང་།སྨྲ་སྤོབས་མ་བྱེད་ཅིགཟས་ལྷུང་བཟེད་གང་སྦྱིན་པ་ལ་བསོད་ནམས་དེ་ལྟ་བུ་མང་པོ་ཞིག་ལྟ་ག་ལ་ནུས་ཞེས་གསོལ།
བཀའ་བསྩལ་པ།ཁྱོད་གང་ནས་ཡོང་།ང་གྲོང་ནས་ཡོང་།ཁྱོད་ཀྱིས་གྲོང་གི་སྔོན་ཤིང་བྷ་ན་ཡམ་གྱི་དཔངས་མཐོང་ངམ།གསོལ་པ།མཐོང་ངོ་།།དཔངས་ལ་ལེ་བར་བཞི་བཅུ་ཡོད་པ་དང་ལོ་རེར་འབྲས་བུ་དཔག་ཏུ་མེད་པ་སྡུད་ནུས་ཤིང་དེའི་ས་བོན་ནི་ཡུངས་དཀར་ཙམ་ལས་མེད་པས་ཤིན་ཏུ་ཆུང་།
བཀའ་བསྩལ་པ།ས་བོན་གང་ཙམ་ཞིག་བཏབ་ན་ལྗོན་ཤིང་དེ་ཙམ་ཞིག་སྐྱེད་ནུས།བྲེ་གང་གིས་སྐྱེད་ནུས་སམ།གསོལ་པ།མང་པོ་མི་དགོས་ཏེ་ས་བོན་གཅིག་གིས་སྐྱེད་ནུས།
བཀའ་བསྩལ་པ།སྨྲ་སྤོབས་མ་བྱེད་ཅིགཡུངས་དཀར་ཙམ་གྱི་ས་བོན་གྱིས་དཔངས་ལ་ལེ་བར་བཞི་བཅུ་ཙམ་དང་འབྲས་བུ་དཔག་ཏུ་མེད་པ་ཞིག་སྡུད་ནུས་པའི་ལྗོན་ཤིང་ཆེན་པོ་སྐྱེད་ག་ལ་ནུས།གསོལ་པ།འདི་བདེན་པ་ཁོ་ནའོ།།
བཀའ་བསྩལ་པ།ས་ཆེན་པོ་ལ་སེམས་ཀྱི་དངོས་པོ་དང་བྲལ་ཡང་འབྲས་བུ་དེ་བཞིན་སྐྱེད་ནུས་ན་དགའ་བའི་སེམས་ཀྱིས་དེ་བཞིན་གཤེགས་པ་ལ་ཟས་ལྷུང་བཟེད་གང་སྦྱིན་པས་འབྲས་བུ་དཔག་ཏུ་མེད་པ་སྨིན་ནུས་པ་སྨོས་ཅི་དགོས།འདིའི་བསོད་ནམས་ནི་བསམ་གྱིས་མི་ཁྱབ་ཅིང་གཞལ་བའི་ཐབས་མེད་དོ།།གསུང་དེས་ཁྱོ་ཤུག་གཉིས་ཀའི་དོགས་པ་བསལ་ནས་འཕགས་པའི་བདེན་པ་མཐོང་བ་རེད།
ད་ལྟ་མི་འགའ་ཞིག་གིས་བསོད་ནམས་ཀྱི་ཚོགས་གསོག་པ་ལ་ཅི་མི་སྙམ་པའི་ལྟ་བ་བཟུང་ནས་ཆོས་ཐམས་ཅད་སྟོང་པ་ཉིད་ཡིན་པས་བསོད་ནམས་ཀྱི་ཚོགས་བསགས་པས་ཅི་ཞིག་བྱེད་ཅེས་སྨྲ།
གལ་ཏེ་རྟོགས་པ་དེ་ལྟ་བུ་དངོས་སུ་ལྡན་ན་མི་ཆོག་པ་མེད་དེ།ཆོས་ཐམས་ཅད་སྟོང་པ་ཉིད་ཡིན་པས་དགེ་བ་མི་སྒྲུབ་བསོད་ནམས་མི་གསོག་པ་ལྟར་ད།ཟ་མ་མི་བཟའ་སྒོར་མོ་མི་སྒྲུབ་པ་དགོས་ཀྱང་རྒྱུན་ལྡན་འཚོ་བའི་ནང་དུ་ནི་དེ་ལྟར་བྱེད་མི་ནུས་པ་རེད།
ཡང་ལ་ལ་ཞིག་ནི་མཐའ་གཉིས་སུ་ལྷུང་བར་དགའ་སྟེ་ཆོས་ཐམས་ཅད་སྟོང་པ་ཉིད་དེ་ཅི་ཡང་མེད་པར་བལྟས་ནས་བསོད་ནམས་ཀྱི་ཚོགས་གསོག་པ་ལ་དགོས་པ་མེད་པར་འདོད་པའི་མཐའ་དང་ཡང་སྟོང་ཉིད་ལ་རྒྱུས་གང་ཡང་མེད་པར་དངོས་པོ་ཐམས་ཅད་མི་འགྱུར་བའི་རྟག་པར་བཟུང་ཞིང་བདེན་འཛིན་བརྒྱ་སྟོང་གི་དྲྭ་བར་བཙུད་ནས་སྡུག་བསྔལ་ཁྲི་ཕྲག་གིས་མནར་བའི་མཐའ་སྟེ་མཐའ་འདི་གཉི་ག་ཡང་གོལ་ས་ཆེན་པོ་ཞིག་ཡིན།
ཆོས་ཐམས་ཅད་སྟོང་པ་ཉིད་ཡིན་རུང་རྒྱུ་འབྲས་མི་འགག་པའི་ཚུལ་འདི་ཤེས་དགོས།རང་རེས་སྒྱུ་མ་ལྟ་བུའི་བསོད་ནམས་གསོག་པ་དང་སྒྱུ་མ་ལྟ་བུའི་སྡིག་སྒྲིབ་སྦྱངས་ཏེ་ད་གདོད་སྒྱུ་མ་ལྟ་བུའི་སྡུག་བསྔལ་བསལ་ནས་སྒྱུ་མ་ལྟ་བུའི་ཐར་བ་མངོན་དུ་བྱེད་ནུས།
རྒྱ་ནག་གི་སློབ་དཔོན་ཆེན་མོ་ཨོའུ་དབྱེས་ཀྱིས།
སྒྱུ་མ་ལྟ་བུའི་དགེ་བློ་ཞིག་གིས། །
སྒྱུ་མ་ལྟ་བུའི་སངས་རྒྱས་དམིགས་ཤིང་། །
སྒྱུ་མ་ལྟ་བུའི་སྡིག་སྡུག་བསལ་ནས། །
སྒྱུ་མ་ལྟ་བུའི་བསོད་ནམས་འབྱུང་ངོ།།
ཞེས་གསུངས་པ་རེད།
གལ་ཏེ་བསོད་ནམས་གསོག་པའི་དགོས་པ་ཡང་དག་པར་ཤེས་ན་སྟོང་ཉིད་ཀྱི་དོན་རྟོགས་པའམ་ཐ་ན་སངས་རྒྱས་ཀྱི་གོ་འཕང་མངོན་དུ་བྱས་ཀྱང་ཚོགས་གསོག་དགེ་སྒྲུབ་ཀྱི་བྱ་བ་ཐམས་ཅད་མི་སྤོང་བ་འདི་ཤེས་ནུས།
སྔོན་འདས་པའི་དུས་སུ་སྟོན་པ་བཅོམ་ལྡན་འདས་ཀྱི་ཉན་ཐོས་ཀྱི་སློབ་མ་དགྲ་བཅོམ་པ་མ་འགགས་པ་སྤྱན་ཟུང་ལོང་བར་གྱུར།ཆོས་གོས་ཐེད་ཀྱང་ལྷན་པ་རྒྱག་མི་ཐུབ་པས་ཁོང་གིས་སུ་ཞིག་གིས་བསོད་ནམས་འདོད།ང་ལ་གོས་འཚེམ་པའི་གྲོགས་གྱིས་ཤིག་ཅེས་གསུངས།
དེའི་ཚེ་སྟོན་པ་བཅོམ་ལྡན་འདས་ཁོང་གི་དྲུང་དུ་ཕེབས་ནས་ངས་བསོད་ནམས་འདོད།ངས་ཁྱོད་ལ་ལྷན་པ་རྒྱག་པའི་གྲོགས་བགྱི་ཞེས་གསུངས།
དེས་སངས་རྒྱས་ཀྱི་གསུང་ཡིན་པར་ཤེས་ཏེ་འདར་སིང་ངེ་བ་ཞིག་བྱུང་ནས་འཕྲལ་དུ་བཅོམ་ལྡན་འདས་གཞན་ལ་སྨྲས་ཀྱི་ཁྱེད་ལ་མ་ཞུས་སོ།།ཞེས་གསོལ།
བཅོམ་ལྡན་འདས་ཀྱིས་ཅིའི་ཕྱིར་ངས་སྒྲུབ་མི་རུང་།སངས་རྒྱས་སུ་ཟིན་ཡང་བསོད་ནམས་གསོག་པའི་ལས་འདོར་མི་རིགས་པར་བསོད་ནམས་ཇི་ཙམ་མང་དུ་བསགས་ན་དེ་ཙམ་ལེགས་ཞེས་གསུངས་པ་རེད།
ཡོན་ཏན་ཐམས་ཅད་རྫོགས་པའི་སངས་རྒྱས་བཅོམ་ལྡན་འདས་ཀྱིས་ཀྱང་བསོད་ནམས་ལ་མཐོང་ཆེན་དེ་ཙམ་བྱེད་པས་ངེད་ཅག་སོ་སོའི་སྐྱེ་བོ་རྣམས་ཀྱིས་ཅིའི་ཕྱིར་མི་བྱེད། དེའི་ཕྱིར།རྟོགས་པ་ཇི་ཙམ་མཐོ་རུང་རང་གཞན་དོན་གཉིས་ཀྱི་ཆེད་དུ་ད་ལྟ་ནས་བཟུང་སྟེ་བསོད་ནམས་རྒྱ་ཆེན་པོ་གསོག་དགོས།
འོ་ན་བསོད་ནམས་ཇི་ལྟ་བུའི་སྒོ་ནས་གསོག་དགོས་ཤེ་ན།དགེ་བ་མང་དུ་བསྒྲུབས་ནས་སེམས་ཅན་གྱི་དོན་བྱེད་དགོས་སོ།།