༡༣ བདེ་སྡུག་གི་བདེན་པའི་རང་ཞལ། མཁན་པོ་བསོོད་དར་རྒྱས་ཀྱིས་བརྩམས།
ལེའུ་གཉིས་པ།
གུ་ཡངས་བློ་བདེ་ཡི་ངང་ནས། །མགོ་ནག་སྐྱིད་སྡུག་དེ་གླེང་ངོ་། །
ཤིང་མེ་ལ་བུད་རྗེས་སོལ་བ་ཆེད་དུ་མ་བསྒྲུབས་ཀྱང་རང་ཤུགས་ཀྱིས་འབྱུང་། དེ་དང་ཚུལ་མཚུངས་པར་གལ་སྲིད་གཞན་ཕན་གྱི་སེམས་ཤུགས་ཆེན་ལྡན་ན་ཆེད་དུ་རྩོལ་སྒྲུབ་མ་བྱས་ཀྱང་རང་དོན་འབད་མེད་ལྷུན་གྱིས་འགྲུབ་བོ། །
གལ་སྲིད་ལུང་སྟོང་གི་འཇག་མ་སེལ་བར་འདོད་ན་ཐབས་ལམ་ཆེས་བཟང་བ་ནི་དེ་བཏུལ་ནས་འབྲུ་རིགས་ཀྱི་ས་བོན་གདབ་པ་དེ་ཡིན། དེ་མཚུངས་གལ་ཏེ་རང་ཉིད་ཀྱི་ནང་སེམས་ཀྱི་མི་དགའ་བ་སེལ་བར་འདོད་ན་ཐབས་གཅིག་ཁོ་ན་སྟེ་གཞན་དོན་ལྷུར་ལེན་པའི་སྤྱོད་བཟང་གིས་དེའི་ཚབ་བྱེད་དགོས།
ཐེག་པ་ཆེན་པོའི་མདོ་དང་བསྟན་བཅོས་དག་ལས་སྡུག་བསྔལ་ཐམས་ཅད་ཀྱི་འབྱུང་ཁུངས་ནི་རང་དོན་ཡིད་བྱེད་ཡིན་ཞིང་དགའ་བ་ཐམས་ཅད་ཀྱི་འབྱུང་ཁུངས་ནི་སེམས་ཅན་གྱི་དོན་བྱེད་པ་ཡིན་ཞེས་ཡང་ནས་བསྐྱར་དུ་གསུངས།
ངག་རྒྱུན་དུ་གཏམ་རྒྱུད་འདི་སྐད་ཅིག་ཡོད། དེ་ཡང་སྔོན་མི་ཞིག་འཇིག་རྟེན་བྱེད་པ་པོའི་སར་སོང་ནས་བྱེད་པ་པོ་དང་མཉམ་དུ་ལྷ་ཡུལ་དང་དམྱལ་བའི་གནད་དོན་ལ་བགྲོ་གླེང་བྱས། བྱེད་པ་པོས་མི་དེ་ལ་ཤིན་ཏུ་ལེགས་ཀྱི། ངས་ཁྱོད་ལ་དམྱལ་བ་ཞེས་པ་ཅི་ཞིག་ཡིན་པ་སྟོན་ཞེས་སྨྲས། དེ་ནས་ཁོ་གཉིས་ཁང་ཤག་ཅིག་ཏུ་འཛུལ་བ་དང་དེའི་ནང་དུ་མིའི་ཚོགས་པ་ཞིག་གིས་ཤ་འུ་ཟངས་ཆེན་གང་བསྐོར་ནས་འདུག་ཀྱང་ཐམས་ཅད་བགྲེས་ལྟོགས་ཀྱིས་མནར་ཞིང་རེ་ཐག་ཆད་ནས་སེམས་ཁོང་དུ་ཆུད་འདུག་པ་མཐོང་། དོན་དུ་ཁོ་ཚོས་དཔུང་པ་ལས་ཀྱང་རིང་བའི་གཟར་བུ་ལག་ཏུ་ཐོགས་པས་ཤ་ཁུ་ཁའི་ནང་དུ་བླུག་ཐབས་མེད་པའི་རྐྱེན་གྱིས་རེད་འདུག
བྱེད་པ་པོས་སླར་ཡང་མི་དེ་ལ་རྗེས་སུ་ཤོག་དང་། ད་དུང་ཁྱོད་ལ་ལྷ་ཡུལ་གྱི་རྣམ་པ་སྟོན་ཞེས་སྨྲས། དེ་ནས་ཁོ་གཉིས་ཁང་ཤག་གཞན་ཞིག་ཏུ་འཛུལ། དེའི་ནང་དུ་ཡོད་པ་ཐམས་ཅད་ཁང་ཤག་སྔ་མ་དང་གཅིག་པ་ཡིན་ཏེ་མིའི་ཚོགས་པ་ཞིག་དང་ཤ་ཁུ་ཟངས་ཆེན་གང་དང་རིང་ཐུང་འདྲ་བའི་གཟར་བུ་བཅས་སོ། །འོན་ཀྱང་མི་འདྲ་ས་གཅིག་པུ་ནི་འདིའི་ནང་གི་མི་ཚང་མ་ནི་དགའ་བའི་གར་དང་བཅས་ཏེ་གླུ་ལེན་བྲོ་འཁྲབ་བྱེད་བཞིན་འདུག
མི་དེས་བྱེད་པ་པོ་ལ་ངས་ཤེས་མ་སོང་། ཁོར་ཡུག་གཅིག་ཡིན་རུང་ཅིའི་ཕྱིར་ཁོ་ཚེ་སྐྱིད་ཅིང་ཁང་ཤག་གཞན་པ་དེའི་མི་རྣམས་ནི་སྡུག་གིས་ནོན་ཞེས་དྲིས། བྱེད་པ་པོ་ན་རེ། འདི་གོ་ཤིན་ཏུ་སླ། ཁང་ཤག་འདིའི་ནང་གི་མི་ཀུན་གྱིས་ཤ་ཁུ་གཞན་ལ་སྟེར་ཞིང་གཞན་པ་དེའི་ནང་གི་མི་དག་གིས་ནི་རང་ཉིད་ཁོ་ན་ལ་བྱིན་པ་རེད་ཅེས་སྨྲས།
དེའི་ཕྱིར་གཞན་གྱི་དོན་སྒྲུབ་པ་ཁོ་ནས་རང་གི་དོན་འགྲུབ་བོ། ། ཆོས་རྗེ་ཡིད་བཞིན་ནོར་བུའི་ཞལ་སྔ་ནས་ཀྱང་ཤིང་མེ་ལ་བུད་རྗེས་སོལ་བ་ཆེད་དུ་མ་བསྒྲུབས་ཀྱང་རང་ཤུགས་ཀྱིས་འབྱུང་། དེ་དང་ཚུལ་མཚུངས་པར་གལ་སྲིད་གཞན་ཕན་གྱི་སེམས་ཤུགས་ཆེན་ལྡན་ན་ཆེད་དུ་རྩོལ་སྒྲུབ་མ་བྱས་ཀྱང་རང་དོན་འབད་མེད་ལྷུན་གྱིས་འགྲུབ་བོ་ཞེས་ནན་ཆེར་གསུངས།
བསམ་བློ་ཞིག་ཐོང་དང་། གལ་སྲིད་བདེ་སྐྱིད་ཅེས་པ་རྒྱུ་ནོར་དང་གོ་ས། བརྩེ་དུང་སོགས་རྨང་གཞིར་བྱས་ཏེ་སྐྲུན་དགོས་སྙམ་ན་དེ་ཡང་མ་བརྟགས་པ་སྟེ་གལ་ཏེ་འདི་དག་ལ་གནད་དོན་མི་ལེགས་པ་བྱུང་ན་མི་ཚེ་ཡང་རྨང་གཞི་ཞིག་པའི་གྱང་དང་འདྲ་བར་དྲུངས་ནས་འཇིག་པར་འགྱུར་བ་རེད། ཡིན་ཡང་གལ་ཏེ་དུས་དང་རྣམ་པ་ཀུན་ཏུ་གཞན་ཕན་གྱི་བསམ་པ་རྒྱུད་ལ་ལྡན་ན་འཚོ་བའི་ནང་དུ་བསྟོད་སྨད་ཐོབ་ཤོར་སོགས་ཅི་བྱུང་ཡང་ལྷོད་དེ་ལྷན་ནེ་ལྷང་ངེར་བསྡད་
དེ་མཐར་བྱ་བ་ཅི་ཞིག་བསྒྲུབས་ཀྱང་བསམ་དོན་ཐམས་ཅད་ཡིད་བཞིན་དུ་འགྲུབ་ནུས་སོ། །
དེའི་ཕྱིར། འཇིག་རྟེན་དུ་འཚོ་བ་ནི་ཅི་ཞིག་གི་དོན་དུ་ཡིན་པ་འདི་ལ་ངེས་པར་ངོས་ཟིན་གསལ་པོ་ཞིག་ཡོད་དགོས།