16岁当大人 16两当1斤 作者：杨张悦 改编、朗读 牛美华

16岁当大人   16两当1斤

作者：杨张悦  改编、朗读  牛美华

辣辣上世纪八十年代前，我伲上海市郊农村有个习惯，就是当小囡长到16虚岁个辰光，就可以让伊参加生产队个集体劳动，可以记工分了。辣辣16虚岁以前做田里生活是记不了工分个，即使伊帮大人做了一眼力所能及个事体，譬如讲生产队分配拨每个社员每日天要拔个秧苗，小囡只能帮助大人拔秧，工分是记辣大人伊面，小囡呒没工分个。直到满16虚岁辰光，队长分配拨伊拉做个生活，才记工分。开始算是学生活，一日天争4分工分，相当于一日天赚1角6分到4角洋钿，搿个要看每个生产队个分配情况。葛末侬晓得为啥要定16虚岁当大人呢？迭个脱我伲老祖宗定十六两为一斤个道理是一样个，我伲常庄讲半斤搭仔八两，搿二者轻重相等，比喻伊拉勿相上下，实力相当。

传说我伲个老祖宗观察到北斗七星、南斗六星，再加上旁边个福、禄、寿三星，齐巧是十六星。北斗七星主亡、南斗六星主生，福、禄、寿三星分别主一个人一生个福、禄、寿。伊拉辣辣天浪向看着人个一切。

葛咾讲：人辣做，神辣看。

据讲做生意个人，假使称物事短斤缺两，伊是要受到惩罚个。卖物事少拨人家一两，福星就减脱迭个人个福；少拨二两，禄星就减脱迭个人禄；要是少拨三两，寿星就要减脱迭个人寿。

古代人侪晓得“人辣做，神辣看”，葛咾人侪勿敢做呒没良心个事体。

请您欣赏牛美华老师朗读的更多作品！